12 марти соли 2026, ноҳияи Ишкошим
Дар асоси Нақшаи чорабиниҳои муштараки Мақомоти иҷроияи ҳокимияти давлатии ноҳияи Ишкошим ва Кумитаи иҷроияи Ҳизби Халқии Демократии Тоҷикистон дар ноҳияи Ишкошим конференсияи илмӣ-назариявӣ таҳти унвони “Пешвои миллат ва ташаббусҳои сатҳи ҷаҳонӣ” баргузор гардид.
Кори конференсия бо садо додани Суруди миллии Ҷумҳурии Тоҷикистон оғоз гардида, раиси Кумитаи иҷроияи Ҳизби Халқии Демократии Тоҷикистон дар ноҳияи Ишкошим Муллоева Гулшан суханро ба узви Маҷлиси миллии Маҷлиси Олии Ҷумҳурии Тоҷикистон, раиси ноҳияи Ишкошим Иматшозода Анвар Иматшо доданд.
Раиси ноҳияи Ишкошим Иматшозода Анвар Иматшо дар баромади худ таъкид намуданд, ки ташаббусҳои ҷаҳонии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самтҳои обу иқлим, ҳифзи пиряхҳо, таҳкими сулҳ, маърифати ҳуқуқии ҷомеаи ҷаҳонӣ, зеҳни сунъӣ ва дигар масъалаҳои муҳим, нуфузу эътибори Ҷумҳурии Тоҷикистонро дар арсаи байналмилалӣ ба таври назаррас баланд бардоштаанд.
Инчунин қайд гардид, ки таҳти сиёсати хирадмандонаи Пешвои тоҷикони ҷаҳон муҳтарам Эмомалӣ Раҳмон Ҷумҳурии Тоҷикистон имрӯз дар арсаи байналмилалӣ ҳамчун давлати ташаббускор ва сулҳпарвар эътироф мегардад. Иқдомҳои наҷибу шоистаи роҳбари давлат дар самти ҳифзи арзишҳои миллию фарҳангӣ, таҳкими робитаҳои гуманитарӣ ва рушди дипломатияи фарҳангӣ мавқеи Тоҷикистонро дар ҷомеаи ҷаҳонӣ боз ҳам таҳким бахшидаанд.
Муовини раиси ноҳияи Ишкошим Назарзода Душанбе Назаршо дар мавзӯи “Сиёсати сулҳпарваронаи Тоҷикистон ва ташаббусҳои ҷаҳонии Пешвои миллат дар таҳкими сулҳ ва маърифати ҳуқуқӣ” суханронӣ намуда, қайд карданд, ки имрӯз Ҷумҳурии Тоҷикистон дар арсаи ҷаҳонӣ ҳамчун давлати сулҳпарвару ташаббускор шинохта шудааст. Асоси ин сиёсати хирадмандона ба сиёсати дохилию хориҷии давлат, ки аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ мегардад, вобаста мебошад.
Ҳамчунин зикр гардид, ки яке аз ташаббусҳои муҳими сатҳи ҷаҳонии Пешвои миллат пешниҳоди қабули қатъномаи махсуси Созмони Милали Муттаҳид оид ба “Даҳсолаи таҳкими сулҳ ба хотири наслҳои оянда” мебошад.
Дар идомаи конференсия Хоников Раҳимбек Нафасбекович вобаста ба мавзӯи эълон гардидани солҳои 2025–2034 ҳамчун “Даҳсолаи амал барои илмҳои криосфера” маърӯза намуданд. Инчунин котиби комиссияи васояту парастории Мақомоти иҷроияи ҳокимияти давлатии ноҳияи Ишкошим Муллоева Гулчаман дар мавзӯи “Таъғирёбии иқлим – мушкилоти глобалии асри XXI” баромад карданд.