Санаи 14 уми октябри соли 2020 дар толори Мақомоти иҷроияи ҳокимияти давлатии ноҳияи Ишкошим бо иштироки муовини якуми раиси ВМКБ, муҳтарам Мирзонаботов Алишер Худобердиевич ҷаласаи натиҷаҳои рушди иҷтимоиву иқтисодии ноҳияи Ишкошим дар нуҳ моҳи соли 2020 баргузор гардид. Дар кори ҷаласа мудирони шуъбаву бахшҳои дастгоҳи раиси ноҳия, роҳбарони идораву муассисаҳо, сардорони сохторҳои ҳуқуқӣ ва раисони ҷамоатҳои деҳот иштирок доштанд.
Ҳамзамон бояд қайд намуд, ки дар давоми нуҳмоҳи соли 2020 дар натиҷаи таваҷҷуҳи доимии давлату Ҳукумати мамлакат ва заҳмату талошҳои ватандӯстонаи мардуми сарбаланди ноҳия бо таъсири омилҳои манфии беруна ва хавфҳо яъне дар шароити паҳншавии бемории сироятии коронавирус ҷиҳати коҳиш додани пайомадҳои он ба иқтисоди ноҳия тамоми тадбирҳо андешида шуда дар ин раванд доир ба дарёфти сарчашмаҳои маблағгузории соҳаҳои иҷтимоиву иқтисодии ноҳия корҳои назаррас анҷом дода шуданд.
Оид ба ҷамъбасти натиҷаҳои рушди иҷтимоиву иқтисодии ноҳияи Ишкошим дар нуҳ моҳи соли 2020 муовини якуми раиси ноҳияи Ишкошим Некқадамзода Илол баромад намуд.
Ҳамчунин дар баробари маъруза мудирони шуъбаву бахшҳои Мақомоти иҷроияи ҳокимияти давлатии ноҳияи Ишкошим ва роҳбарони идораву муассисаҳои ноҳия оид ба фаъолияти нуҳмоҳаи худ баромад намуданд.
Муовини якуми раиси ВМКБ ,муҳтарам Мирзонаботов Алишер Худобердиевич аз ҷамъбасти натиҷаҳои рушди иҷтимоиву иқтисодии ноҳияи Ишкошим дар нуҳ моҳи соли 2020 изҳори қаноатмандӣ намуда, баҳри дар сатҳи баланд баргузор намудани маъракаи муҳим даъвати ҷавонон ба хизмати ҳарбӣ ва саривақт иҷро намудани нақшаи даъват ва дастҷамъона ширкат варзидани мардуми шарафманди ноҳияи Ишкошим ба кулли сокинон изҳори миннатдорӣ намуданд.
Инчунин барои беҳтару хубтар ва мувофиқ ба мақсад роҳандозӣ намудани фаъолияти минбаъда дар самти соҳаҳои иҷтимоиву иқтисодии ноҳия ба маъсулин дастуру супоришҳои мушаххас доданд.
