Наврӯз рамзи пирӯзии некӣ бар бадӣ, сардӣ ба гармӣ ва тарғибгари ваҳдату ҳамдилии сокинони сайёра аст. Омили аслии пояндагӣ ва мондагории Наврӯз, пеш аз ҳама, дар он аст, ки ин ҷашн аз оғози пайдоиш то ба имрӯз ба қалби пиру ҷавон хуррамию бедорӣ ато менамояд. Он чӣ дар зеҳн ва амалу кирдори мардум дар арафаи ин ҷашн ба вуҷуд меояд, танҳо шодӣ асту сурур, хайру баракат ва тозакорию озодагист. Арҷ гузоштан ба ин суннатҳои неки аҷдодӣ барои баланд бардоштани сатҳу сифати маърифати ҷавонон, ташвиқу тарғиби меҳнату ҳаёти солим, беҳтар гардидани ахлоқи ҳамида, инчунин ба дарки худшиносиву худогоҳӣ, бузургдошти мероси ниёгон, аънанаҳои нек ва ифтихор ба пешрафту шукуфоӣ мусоидат менамояд.
Халқи тоҷик ин иди муътабару муқаддасро бо шаҳомати хос таҷлил намуда, беҳтарин орзуву ниятҳои неки худро ба Наврӯзи хуҷастапай пайванд медонанд. Қобили қайд аст, ки ҳамаи суннату оинҳои наврӯзӣ маъно ва сарчашмаи бузурги ахлоқӣ ва иқдом ба сӯи бунёдкориву созандагӣ мебошанд.
Мардуми ишкошимзамин дар қатори дигар ҳамватанон иди Наврӯзро ҳанӯз аз давраҳои пеш ҳамчун рамзи нек, оғози пурфайзи сол, расму суннатҳо ва оинҳои нек, дуои хайру эҳсон таҷлил менамуданд. Омад – омади ин ҷашни пурифтихор синаҳоро аз кибру ғурур, танҳоро аз кина, дидаҳоро аз адовати сол тоза мекунад. Одамон барои хонадони якдигар, хешу табор, ёру дӯстон, хонаободӣ, рӯзгори нек ва бахту саодатро орзу менамоянд. Нигоҳи гарму тоза, рухсори гулгуни наврӯзӣ ва гуфтани “Шогуни баҳор муборак” маънои ҳамин гуфтаҳост. Ҳамзамон бояд қайд намуд, ки Наврӯзи имсоларо мардуми ноҳияи Ишкошим бо шукуҳу шаҳомати хоса таҷлил намуданд. Зеро дар таҷлили ҷашни Наврӯзӣ раиси Вилояти Мухтори Кӯҳистони Бадахшон муҳтарам Файзов Ёдгор Доёрович ва муовини якуми директори Маркази миллии қонунгузории Ҷумҳурии Тоҷикистон, муҳтарам Субҳиддинзода Баҳриддин иштирок доштанд.
Ҳайати расмӣ ва меҳмононро дар даромадгоҳи Ҷамоати деҳоти Вранг, деҳаи Ямг истиқбол намуда, сипас ҳайати расмӣ ва меҳмонон ба самти базмгоҳи Наврӯзии сатҳи ноҳиявӣ, ки дар маркази Ҷамоати деҳоти Вранг ташкил карда шуда буд ҳаракат намуданд. Ҳайати расмӣ ва меҳмонон аз намоишгоҳи дастовардҳои ҳунарҳои мардумӣ ва таомҳои миллӣ дидан намуданд.Тибқи расму оини наврӯзии мардуми ноҳия маросими ҷуфтбаророн доир гардид, ки ҳайати расмӣ ва меҳмонон ба назди бобои деҳқон омада, нахуст раиси раиси Вилояти Мухтори Кӯҳистони Бадахшон, муҳтарам Файзов Ёдгор Доёрович ба замин тухми гандум пошиданд.
Дар мавриди баргузории ҷамъомади тантанавии Наврӯзӣ раиси ноҳияи Ишкошим, муҳтарам Мирзозода Мусо Одинамуҳаммад ташрифи меҳмононро ба базмгоҳи Наврӯзии сатҳи ноҳиявӣ самимона шодбош намуданд.
Муовини якуми директори Маркази миллии қонунгузории Ҷумҳурии Тоҷикистон, муҳтарам Субҳиддинзода Баҳриддин ва раиси Вилояти Мухтори Кӯҳистони Бадахшон, муҳтарам Файзов Ёдгор Доёрович ҳамаи сокинони ноҳияи Ишкошимро ба Наврӯзи хуҷастапай самимона табрику муборакбод намуданд.
Дар арафа ва таҷлили Иди байналмилалии Наврӯз аз фонди захиравии раиси ноҳияи Ишкошим ба 24 нафар шаҳрвандон кӯмаки яквақтаи маблағӣ расонида шуд. Инчунин туйи 14 нафар тифлон ва ду ҷуфт туйи навхонадорон доир карда шуд.
Ҳамзамон аз тарафи идораву муассисаҳо, соҳибкорон ва дигар шахсони саховатпеша ба ниёзмандон кӯмакҳои моддӣ расонида шуданд, ки дар маҷмуъ 23880 сомониро ташкил медиҳад.Барномаи театрикунонидашудаи ҳунармандони ноҳияи Ишкошим муҳтавои тантанаи ҷашнӣ буда писанди меҳмонон ва ҳозирин гардид.
