Ҷиҳати вусъат бахшидан ба равандҳои инноватсионӣ ва истифодаи ҳамаҷонибаи имкониятҳои технологияҳои рақамӣ дар иқтисодиёт пешниҳод менамоям, ки солҳои 2025-2030 “Солҳои рушди иқтисоди рақамӣ ва инноватсия” эълон карда шавад-омадааст дар Паёми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, ки санаи 28-уми декабри соли 2024 дар бинои муосири парламенти Ҷумҳурии Тоҷикистон баргузор гардид. Барои татбиқ намудани рушди иқтисоди рақамӣ дар панҷ соли оянда Пешвои муаззами миллат ба Ҳукумати Ҷумҳурии Тоҷикистон ва сохторҳои дахлдор ҳафт самти муҳимро пешниҳод намуд, ки он аз такмили фаврии заминаҳои ҳуқуқӣ, инкишоф додани инфрасохтори рақамӣ, таъсиси махзани мукаммали миллии маълумот, рақамикунонии пурраи хизматрасониҳои давлатӣ, рушди сармояи инсонӣ бо роҳи омӯзиш ва бозомузии кадрҳо доир ба технологияҳои рақамӣ, истифодаи васеи зеҳни сунъӣ дар пешниҳоди хизматрасониҳо, таъмини амнияти киберии махзанҳои маълумот ва ташаккул додани соҳибкории рақамӣ аз ҷумлаи онҳо мебошанд. Дар ин маврид бояд қайд намуд, ки гузаштан ба иқтисоди рақамӣ талаботи замон буда, ба рушди устувори иқтисоди миллӣ мусоидат менамояд. Дар Ҷумҳурии Тоҷикистон дар самти рақамикунонии иқтисодиёт Консепсияи иқтисоди рақамӣ дар Ҷумҳурии Тоҷикистон, Барномаи миёнамуҳлати рушди иқтисоди рақамӣ дар Ҷумҳурии Тоҷикистон барои солҳои 2021-2025, Стратегияи рушди зеҳни сунъӣ дар Ҷумҳурии Тоҷикистон барои давраи то соли 2040, Барномаи савдои электронӣ дар Ҷумҳурии Тоҷикистон барои солҳои 2025-2029 ва тағйиру иловаҳо ба беш аз 100 санади меъёрии ҳуқуқӣ аз тарафи Ҳукумати мамлакат қабул гардида, мавриди амал қарор доранд. Амалисозии иқтисоди рақамӣ имкон медиҳад, ки хизматрасониҳои давлатии рақамӣ, рушди соҳаҳои иқтисоди миллӣ, даромади буҷет, шаффофият, соддагардонии расмиёт ва дар маҷмуъ сатҳи зиндагии аҳолӣ беҳтар гардад.
Омили муҳими рушди иқтисодиёти рақамӣ мавҷудияти мутахассисони боистеъдод ва соҳибихтисос мебошад. Ҳоло дар тамоми минтаҳои кишварамон ба ин самт диққати аввалиндараҷа равона шуда истодааст.
Дар ин маврид бояд қайд намуд, ки барои тақвият додани раванди рушди иқтисоди рақами нақш ва аҳамияти зеҳни сунъӣ мақом ва ҷойгоҳи махсусро доро мебошад. Ташаббуси навбатии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маҷмааи Умумии Созмони Миллали Муттаҳид таҳти унвони “Нақши зеҳни сунъӣ дар фароҳам овардани имконоти навин барои рушди устувор дар Осиёи Марказӣ” бо иттифоқи оро ва якдилона санаи 25-уми июли соли 2025 бо қатъномаи махсус қабул гардид ва ҷойгоҳи махсуси давлати моро дар арсаи ҷаҳонӣ муаррифӣ намуд.
Мудири бахши иқтисод ва савдои
МИҲД-и ноҳияи Ишкошим Раҳимбек Хоников