Ҷаҳонро ба дониш тавон ёфтан…
Вазъи имрузаи сиёсии ҷаҳон,ки хеле зудтағйирёбанда ва ноором аст, танҳо ба кишварҳое имкони вуҷуд доштану пеш рафтанро медиҳад,ки миллаташон бо донишҳои ҷаҳони муосир хуб ошно буда, дар баробари ин мардуми тамоми минтақаҳояшон новобаста аз хусусиятҳои забонӣ,эътиқоди динӣ ва дигар ҷанбаҳо бояд сарҷамъу муттаҳид бошанд,миллаташонро дар ҳама ҳолат дар ҳамбастагӣ ҳифз карда тавонанд ва фирефтаи ҳаргуна гуруҳҳо,созмонҳо,ки характери экстремистию террористӣ доранд ва доираҳои ғаразноки сиёсӣ набошанд.Барои ин зарур аст то ниҳодҳое,ки фаъолияташон ба таълиму тарбияи насли наврасу ҷавон дар зинаҳои таҳсилоти томактабӣ ва муассисаҳои таълимӣ равона карда шудааст,шабонарӯз меҳнат кунанд ва пайваста дар зеҳни насли наврасу ҷавон сидқан дӯст доштани Ватани азиз,арҷ гузоштан ба муқаддасоти он,ҳифз намудан аз дастовардҳои даврони соҳибистиқлолии кишвар,қадр намудани Ваҳдати миллӣ,ки бо бисёр ҷонбозиҳо ба даст омадааст,ҷойгир кунонидан аст.Ин раванд пеш аз ҳама аз оила ва кӯдакистон шуруъ гардида,баъдан дар мактабҳову,донишгоҳҳо такмил меёбад.Ин равандест бисёр бардавом ва бисёр тӯлонӣ.Дар ин раванд инчунини дигар дар радифи омӯзгорон бояд ҳам аҳли қалам,ҳам занону ва умуман тамоми қишрҳои ҷомеа низ бетараф наистода,онро кори ҳаррӯзаи худ ҳисобанд.Дар он сурат мо метавонем,ки миллатамонро аз бисёр хатарҳое ба монанди терроризму ифротгароӣ ва дигар зуҳуроти номатлуб ҳифз намоем,чункӣ терроризму ифротгароӣ дар шароити ҳозираи ҷаҳон бо суръати баланд доман паҳн намуда истода,мардуми олам дар муқовимат алайҳи он оҷизӣ кашида истодаанд.Ин аст,ки бар асари ин падидаи ба ҷони инсоният хатарзо манзилҳои зисти аҳолӣ ва садҳо иншоотҳои таъиноти гуногун, шаҳрҳо ва ёдгориҳои безаволи таърихии чандинҳазорсола валангор шуда,садҳо нафар бегуноҳон ҳамарӯза қурбон мешаванд.Мардуми муқими минтақаҳои наздисарҳадии ноҳияи мо шоҳиди даргириҳо, бенизомиҳо ва қурбониҳои зиёда аз 40-солаи дар Аморати исломии Афғонистон ба вуқуъ омада шуда истодааанд. Ҳамаи ин шаҳодат аз бесаводӣ,сатҳи пасти дониш,хурофотпарастӣ ва ҷаҳолати инсон медиҳад.
Дар саргаҳи ҳамаи ин бенизомиҳо бесаводӣ,сатҳи пасти маърифат ва ҷаҳолати инсон қарор дорад.
Аз қабули Қонун “Дар бораи масъулияти падару модар дар таълиму тарбияи фарзандон” соли равон 11 сол сипарӣ мегардад.Зарур аст,ки амалишавии тамоми нуқтаҳои Қонуни мазкур таҳти назорати қатъӣ қарор дода шуда,мақсади асосии он,ки пурзӯр намудани масъулияти падару модар дар таълим ва тарбияи фарзандон дар руҳияи ватандӯстӣ,ифтихори ватандорӣ,арҷ гузоштан ба муқаддасоти миллӣ ва умумибашарию фарҳангӣ аст,бо роҳи тарғибу ташвиқи дуруст дар зеҳни ҳар яке аз волидайн ва насли наврасу ҷавон ҷойгир карда шавад.
Насле ки дорои маърифати баланд,ҷаҳонбинии васеъ,сидқан дӯстдори ватани аҷдодӣ,эҳтиромгузор ба арзишҳои олии кишвар ва мусаллаҳ бо донишҳои ҳозиразамон аст,бешак созандаи Ватан мебошад.
Ҷаҳонро ба дониш тавон ёфтан,
Ба дониш тавон риштану бофтан.
Ҳамин насл метавонад,кишвари азизамон-Тоҷикистони соҳибистиқлолро,ки ба ҷавони 30 сола шабеҳ асту дар ҳоли гулгулшукуфӣ қарор дорад,аз тамоми хатарҳои эҳтимолӣ ҳифз намояду барои расидан ба ҳадафҳои олии созандагию бунёдкории Ҳукумати кишвар пояҳои устувор гузорад.
Муовини раиси ноҳияи Ишкошим Холдорзода А.Ғ