Баромади
муовини раиси ноҳияи Ишкошим оид ба корҳои идеологӣ Назарзода Душанбе Назаршоҳ дар машварати августии омӯзгорони ноҳия
Муҳтарам омӯзгорон!
Ҳозирини гиромӣ!
Пеш аз ҳама салом арз менамоям ба якояки Шумо омӯзгорони дар ниҳоят арҷманду гиромӣ!Хоҳони онам, ки ҳамаи вақт сиҳатманд, хонаобод ва дар ифои пур маҳсулатон мауваффақ бошед.
Ҳамасола тибқи нақшаи кории шуъбаи маориф машварати омӯзгорон баъд аз таътили чандавақта баргузор мегардад,Воқеан баргузории ин мушовара худ як омили иттиҳодиву ҳамфикр будан ва саривақт маълумот гирифтан аз навидҳои соҳаи маориф мебошад.Ҳамчунин омодагиро ба соли нави таҳсил бештар мегардонад.
Ҳозирини гиромӣ!
Ҳангоме, ки омӯзгор ва ё устод мегуем зери ин мафҳумҳо ҳамеша ба назари мо шахси меҳрубон, хоксор хуллас чароғи илму маърифат намоён мешавад.Маҳз омӯзгор аст, ки дар ҳама давру замонба мардум хату савод меомӯзонад.Гузаштаро ба ҳозира пайваст менамояд.
Муаллимро имрӯз метавонем ба равшангари шоми шогирдон ташбеҳ диҳем, нуре гуем, ки чашмони шогирдонро равшанӣ мебахшад, оламро мунаввар ва мушкили ҳамаро осон мегардонад.
Сарчашмаи ҳамаи хушиҳо, ободии ҳамаи маҳфилҳо, бузург гардидани ҳамаи шогирдони баркамол маҳз ба омӯзгорон вобастагӣ дорад.Омӯзгорон вазифаи ниҳоят душворро ба зимма гирифта дар зиндагии пур аз розу ниёз тифли инсониятро тарбия менамоянд, илм меомӯзонанд, ки чандон кори осон нест.
Дар ин ҷода ман аз фаъолияти пурсамару назарраси ҳамаи муаллимони муассисаҳои таҳсилотии ноҳияи Ишкошим дар соли таҳсили 2021-2022 ёдовар гардида, барои ба даст овардани натиҷаҳои самарабахш сипосу миннатдории амиқи худро баён менамоям.Аҳсан, бори дигар сиҳатманд, сарбаланд, соҳиби рӯзгори ободу обрӯи комил бошед.
Далели ин гуфтаҳо он аст, ки соли 2022 хонандагони муассисаҳо дар озмунҳову олимпиадаҳои фаннӣ то сатҳи ҷумҳурӣ иштирок намуда, бо беҳтарин дастовардҳо ба ноҳия баргаштанд.Ҳамчунин соли равон дар озмунҳои “Илм фуруғи маърифат”, “Фуруғи субҳи доноӣ китоб аст” ва “Тоҷикистон Ватани азизи ман” дар сатҳи ноҳия иштирок намуда, теъдоди зиёдашон ба даври вилотӣ роҳхат гирифтанд.
Натиҷаи дигари мусбии сатҳ ва савияи хуби дониши хонандагон дар он зоҳир гардид, ки хатмкардаҳои муассисаҳои таҳсилотӣ ба муассисаҳои таҳсилотии олии кишвар ҳуҷҷат супорида 80 фоизашон шомили ин муассисаҳо гардиданд. Ҳамзамон 19 нафар сазовори квотаи Президенти Ҷумҳурии Тоҷикистон гардиданд. Ин ҳама дастовардҳои беназири сол дар соҳаи маорифи ноҳия мебошад.
Мақомоти иҷроияи ҳокимияти давлатии ноҳияи Ишкошим бо мақсади беҳтар гардидани шароиту имкониятҳо барои таълиму тарбия ва барои омӯзгорон пайваст кӯшиш ба харҷ дода, чораҳои зарурӣ андешида истодааст.
Бояд хотрирасон намуд, ки вазъи техникии муассисаҳои таҳсилотӣ таҳти назорати Мақомоти иҷроияи ҳокимияти давлатии ноҳияи Ишкошим қарор дошта, дар ин ҷода баҳри бартараф намудани ҳолатҳои садамавии муассисаҳо то солҳои 2024-2025 корҳо ба нақша гирифта шуда аллакай рафти корҳои сохтмонии МТМУ №13-и деҳаи Птуп оғоз гардид.Инчунин раванди корҳои созандагии муассисаи таҳсилотии № 31- и деҳаи Куҳи Лаъл оғоз мегарданд.
Дар фарҷоми сухан бо итминони комил қайд менамоям, ки Шумо омӯзгорони азизу гиромӣ нангу номус ва ифтихори баландӣ миллӣ доред.Бо азму иродаи қавӣ ва неруи нав дар таълиму тарбияи насли наврас камари ҳиммат баста дар ҷодаи баланд бардоштани дониш дар соли таҳсили 2022-2023 иқдоми наҷиб хоҳед гузошта маҳз тавассути дониш ва нерӯи зеҳни ноҳияро дар миқёси вилоят, ҷумҳурӣ ва берун аз он муаррифӣ хоҳед намуд.
Боқӣ комёбу хушбахт бошед!
Ташаккур ба диққататон!