Бо мақсади сазовор ва дар сатҳи баланд таҷлил намудани ҷашни пурифтихори миллӣ 30 солагии Истиқлолияти давлатии Ҷумҳурии Тоҷикистон дар ноҳияи Ишкошим корҳои ободониву созандагӣ бо маром идома дошта, рӯз то рӯз симои деҳот, марказҳои ҷамоатҳои деҳот ва маркази ноҳия ба худ симои навро зам намуда истодаанд.Бо ҳамин мақсад ширкати “Помир энерҷӣ” низ кӯшиш ба харҷ дода истодааст, ки аҳолии вилоят алалхусус ноҳияи Ишкошимро бо барқи хушсифат ва дастрас таъмин намояд.
Лозим ба зикр аст, ки дар баробари дигар лоиҳаҳои ширкати “Помир энерҷӣ”, ки амалӣ гардида истодаанд, лоиҳаи “Барқикунонии деҳот дар Тоҷикистон” мавқеи муҳим дошта, дар доираи лоиҳаи мазкур бояд то охири соли 2021 26 адад деҳаҳои вилоят, ки айни замон ба қувваи барқ дастрасӣ надоранд пурра ба қувваи барқ таъмин карда шаванд.
Худи имрӯз дар деҳаи Ширгини Ҷамоати деҳоти Вранг бо мақсади дастрасии доимӣ доштан ба неруи барқ 12 хоҷагии деҳа бо қувваи барқ таъмин карда шуд.
Ҳамзамон бояд қайд намуд, ки дар ин самт 12 адад сутуни хати интиқоли қувваи барқи 0,4 кВ ва зеристгоҳи трансформатори тавоноиаш 63 кВ аз ҷониби пудратчӣ ва мутахассисони ширкати “Тоҷикгидроэлектомонтаж” насб карда шуданд.
Дар маросими ба истифодадиҳии ин зеристгоҳ раиси ноҳияи Ишкошим Мирзозода Мусо Одинамуҳаммад ва намояндагони ширкати “Помир энерҷӣ”иштирок намуда, бо ҳозирин суҳбату вохӯрии судманду хотирмон доир гардид.
