Сухани табрикотии
раиси ноҳияи Ишкошим Мирзозода Мусо ба ифтихори 29 солагии Истиқлолияти давлатии Ҷумҳурии Тоҷикистон
Ҳамдиёрони азиз!
Боиси фахру ифтихор аст, ки имрӯз дар фазои сулҳу суботи комил ва ҷомеаи амну осоишта мо ин санаи муҳиму таърихӣ яъне 29 солагии Истиқлолияти давлатии Ҷумҳурии Тоҷикистонро таҷлил менамоем.
Аз ин рӯ бо камоли эҳтиром ва самимият якояки Шумо мардуми сарбланду меҳнатпазир ва дар симои Шумо ҳамаи ҳамдиёрони берунмарзиро ба ифтихори ҷашни 29 солагии Истиқлолияти давлатии Ҷумҳурии Тоҷикистон таҳният гуфта, пеш аз ҳама ба Шумоён саломатии доимӣ ва рӯзи хушу рӯзгори ободро хоҳонам.
Истиқлолияти Тоҷикистон ин худ таърихи навин дар ташкили давлатдории мо тоҷикистониён буда ҳамчунин даврони соҳибистиқлолии кишвари маҳбубамон ин раванди мукамали бунёдкорию созандагӣ дар ҳаёти ҳар яки мо мебошад.
Ҳарчанд, ки истиқлолияти мо ҷавон аст, вале решаҳои он ба умқи таърихи пурифтихори халқамон мерасанд ва аз муборизаҳои фидокоронаи ҳазорон нафар фарзандони далеру қаҳрамони миллатамон, ки дар роҳи озодиву истиқлоли сарзамини аҷдодиамон ҷон фидо карданд, шодоб гардидаанд.
Ҳукумати Ҷумҳурии Тоҷикистон бо сарварии Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар муддати 29 соли истиқлолият тавонист, ки бо вуҷуди мушкилоту монеаҳои зиёд пешрафти усутувори ватанамонро таъмин намояд, мақоми онро дар арсаи байналмилалӣ боло бардорад, пояҳои давлатдории мустақили худро тақвият бахшад, тамоми кӯшишу талош ва захираву имкониятҳои худро ба хотири фароҳам овардани шароити мусоид барои зиндагии шоистаи халқамон равона созад.
Ин ҳама файзу баракат ва нерӯи истиқлолият буд, ки мо барои расидан ба истиқлолияти энергетикӣ, баромадан аз бунбасти коммуникатсионӣ, раҳо намудани мамлакат ва таъмини амнияти озуқаворӣ дар муддати начандон тӯлонӣ ба дастовардҳои зиёд ноил гаштем ва фаъолияти созандаи Ҳукумати мамлакат дар ин самтҳои стратегӣ рӯз то рӯз вусъат ёфта истодааст.
Истиқлолият Тоҷикистонро бо ҷаҳон ва ҷаҳонро бо Тоҷикистон пайванди ногусастанӣ ва ҳамешагӣ бахшид.
Ишкошим низ яке аз гӯшаву канор ва мавзеҳои таърихии мамлакатамон ба ҳисоб рафта, қобили зикр аст, ки дар даврони соҳибистиқлолии ватан дар ҳаёти иқтисодиву иҷтимоӣ ва фарҳангии он пешравиҳои назаррас ба амал омаданд.
Бо шарофати истиқлолияти кишвар мо низ тавонистем дар тӯли ин солҳо ба нишондодҳои назарраси иқтисодӣ ноил гардем.
Тамоми талошҳои Ҳукумати кишвар ва мақомоти иҷроияи маҳаллии ҳокимияти давлатии ноҳия низ ба он равона шудаанд, ки ҳар як гӯшаи кишвари азизамон, аз ҷумла ноҳияи Ишкошим рушду тараққӣ карда ба ҳадафҳои ниҳоии худ ноил гардем.
Ба ин мақсад дар замони истиқлолияти давлатӣ дар ноҳияи Ишкошим зиёда аз 100 иншооту биноҳои таъиноти гуногун бо харҷи 400 миллион сомонӣ бунёд карда шуданд.
Бояд қайд намуд, ки соҳаи кишоварзӣ дар рушди иқтисодиву иҷтимоии ноҳия нақши назаррас дошта, зиёда аз 11 ҳазор нафар аҳолии ноҳия дар ин соҳа кору фаъолият доранд.
Дар солҳои соҳибистиқлолии ватан дар асоси Барномаи азхудкунии заминҳои нав дар давоми солҳои 2008-2010 аз ҳисоби маблағҳои буҷетӣ 100,0 га заминҳои бекорхобида ба гардиши кишоварзӣ ворид карда шуданд.
Дар ин давра истеҳсоли маҳсулоти кишоварзӣ дар маҷмӯъ ба андозаи 11,0 баробар баланд гардида, сол то сол бозори дохила аз натиҷаҳои истеҳсолии кишоварзони ноҳия ғанӣ гардида, талаботи аҳолии ноҳия бо моли ниёзи мардум, аз ҷумла ғалла, картошка, сабзавот, мева, шир, гӯшт ва ғайраҳо то андозае таъмин мегардад.
Дастоварду пешравиҳои дар боло овардашуда худ далели он мебошанд, ки ҳадафҳои асосии Ҳукумати Ҷумҳурии Тоҷикистон ин пеш аз ҳама баланд бардоштани сатҳи зиндагии сокинони кишвар, паст кардани сатҳи камбизоатии шаҳрвандони он ба шумор меравад. Бо шарофати соҳибистиқлолии кишвар мо низ тавонистем дар тӯли ин солҳо ба нишондодҳои назарраси иқтисодӣ ноил гардем. Ман ҳамчун раиси ноҳия бо боварии том ба Шумо ҳамдиёрони азиз гуфтаниям, ки моро чун имрӯз ва чи оянда, бо бардошти ҳисси меҳанпарастӣ, нигоҳи умед ба фардо, ояндаи дурахшон, фатҳи қуллаҳои нави зиндагӣ, пешрафти устувору қувваи ҷанбаҳои мухталифи ҷомеа ва пирӯзиҳои бузурге дар пеш интизор аст. Тамоми бурдбориҳо ва пирӯзӣ ин ҳама аз соҳибистиқлоливу ҳамдилӣ ва бародарии кулли мардуми бофарҳангу куҳанбунёди мо сарчашма мегиранд. Итминони комил дорам, ки дар ояндаи наздик баҳри сазовор истиқбол намудани 30 солагии Истиқлолияти давлатии Ҷумҳурии Тоҷикистон сокинони ноҳия дар шукуфоӣ ва ободонии ноҳия аҳлона саҳми арзандаи худро мегузораанд
Дар фарҷоми сухан бори дигар ҳамаи Шуморо ба таҷлили ҷашни бошукуҳи кишвари маҳбубамон, 29 солагии Истиқлолияти Ҷумҳурии Тоҷикистон табрику шодбош гуфта, ба ҳамагон зиндагии пурфайзу баракат, тани сиҳат ва хонаободиро таманно намуда, баҳри ободию шукуфоии ноҳия, вилоят ва ҷумҳурӣ дар умум Ватани азизамон Тоҷикистони соҳибистиқлол нерӯи созандагӣ ва фатҳи қуллаҳои нав ба навро хоҳонам.
Сарбаланду хушбахт бошед!