Санаи сеюми январи соли 2020 таҳти раёсати раиси ноҳияи Ишкошим Мирзозода Мусо Одинамуҳаммад дар ноҳия маҷлиси ҷамъбасти натиҷаҳои рушди иҷтимоию иқтисодии ноҳияи Ишкошим дар соли 2019 баргузор гардид. Дар кори маҷлиси ҷамъбасти натиҷаҳои рушди иҷтимоию иқтисодии ноҳияи Ишкошим дар соли 2019 муовини раиси Вилояти Мухтори Кӯҳистони Бадахшон Носирзода Умедҷон иштирок доштанд.
Дар маҷлис ду масъала мавриди баррасӣ ва муҳокима қарор дода шуд, аз ҷумла ҷамъбасти натиҷаҳои рушди иҷтимоию иқтисодии ноҳияи Ишкошим дар соли 2019 ва вазифаҳо барои соли 2020 ва рафти иҷрои қарори раиси ноҳия аз 18 июни соли 2018, № 300 оид ба иҷрои Амри Президенти Ҷумҳурии Тоҷикистон аз 22 майи соли 2018, № АП 1059 ҷиҳати омодагии ҳамаҷониба ба ҷашни 30 солагии Истиқлолияти давлатии Ҷумҳурии Тоҷикистон.
Аз рӯи масъалаи якум мудири бахши иқтисод ва савдои Мақомоти иҷроияи ҳокимияти давлатии ноҳияи Ишкошим Атобеков Нуралӣ ва аз рӯи масъалаи дуюм мудири бахши меъморӣ ва шаҳрсозии Мақомоти иҷроияи ҳокимияти давлатии ноҳияи Ишкошим Матробов Вадим гузориш доданд.
Пас маърузачиён ҳамаи сардорони идораву муассисаҳо ва ташкилотҳо новобаста аз шакли моликияташон мухталиф вобаста ба фаъолияти солонаи худ маълумотҳои мухтасар пешниҳод намуданд.
Раиси ноҳияи Ишкошим Мирзозода Мусо Одинамуҳаммад ҳисоботи ҳамаи сардорони идораву муассисаҳо ва ташкилотҳоро шунида ҷиҳати беҳтар намудани фаъолияти минбаъда ва бартарф намудани мушкилотҳои ҷойдошта ба маъсулин дастуру супоришҳои қатъӣ дод..
Дар охири кори маҷлис муовини раиси Вилояти Мухтори Кӯҳистони Бадахшон Носирзода Умедҷон ба сухан баромада, оид ба нишондодҳои ба дастомадаи соли 2019 дар ноҳияи Ишкошим ёдовар шуданд, қайд намуданд, ки мо бояд дар соли 2020 ба мақсади боз ҳам беҳтар намудани фаъолияти корӣ хубтару беҳтар кӯшиш ба харҷ диҳем,зеро дар соли 2020 моро дар пеш маъракаҳои муҳими сиёсӣ интизор аст.
